Një ngjarje e rëndë është raportuar mëngjesin e sotëm në ambientet e dhomave të shoqërimit të Komisariatit të Policisë Vlorë, ku një 32-vjeçar ka humbur jetën. Shtetasi Enea Shparthi, banues në Vlorë, ishte ndaluar nga shërbimet e policisë mbrëmjen e datës 29 gusht 2026, rreth orës 23:00, nën akuzën e veprës penale “Vjedhja”.
Sipas njoftimit zyrtar, rreth orës 09:50, 32-vjeçari është konstatuar në gjendje të rënduar shëndetësore në dhomat e shoqërimit ku po mbahej në pritje të daljes para gjykatës për caktimin e masës së sigurisë. Pavarësisht ndërhyrjes së shërbimit mjekësor dhe transportimit të menjëhershëm drejt Spitalit Rajonal të Vlorës, mjekët konfirmuan vdekjen e tij në orën 10:05.
Nga të dhënat e para, dyshohet se shkaku i vdekjes ka qenë një arrest kardiak. Aktualisht, nën drejtimin e Prokurorisë së Vlorës, po kryhen hetime për të zbardhur rrethanat e plota të kësaj ngjarjeje dhe për të dokumentuar ligjërisht rastin. Pritet që ekspertiza mjeko-ligjore të përcaktojë shkaqet e sakta dhe përfundimtare të humbjes së jetës së 32-vjeçarit.