Haki Dushi, profesor ordinar i Fakultetit Ekonomik të Universitetit të Prishtinës, ka ndërruar jetë dje në moshën 90-vjeçare sipas disa burimeve, ndërsa një tjetër e përcakton mosën 95-vjeçare. Ai njihej si një prej profesorëve të parë të këtij fakulteti në Kosovë dhe ekonomisti i parë i diplomuar në komunën e Gjakovës.
Ai u lind në Gjakovë në vitin 1930, ku kreu shkollën fillore. Shkollën e mesme ekonomike e përfundoi në Pejë, ndërsa studimet e larta në Fakultetin Ekonomik i kreu në Universitetin e Beogradit në vitin 1959. Tezën e magjistraturës dhe doktoraturën i mbrojti në Universitetin e Zagrebit, ndërsa në vitin 1978 fitoi titullin "Doktor i Shkencave Ekonomike" në Universitetin e Prishtinës.
Pas studimeve, punoi në ndërmarrje shoqërore, udhëhoqi degën e BANKKOS-it në Gjakovë dhe Shërbimin e Kontabilitetit Shoqëror. Nga viti 1964 mësoi në Shkollën e Lartë Komerciale në Pejë, ndërsa prej 1969 ligjëroi kontabilitet në Fakultetin Ekonomik të Prishtinës. Ka qenë dekan i këtij fakulteti për dy mandate, përfshirë periudhën 1979-1981, dhe shef i katedrës së kontabilitetit, matematikës dhe statistikës.
Gjithashtu, ligjëroi në Universitetin e Tetovës, ku ushtroi detyrën e dekanit, dhe pas pensionimit udhëhoqi Kolegjin Globus. Ka botuar punime shkencore në revista profesionale.
Ceremonia funerale
Në respekt të veprës së tij, më 17 janar do të mbahet mbledhje komemorative në Fakultetin Ekonomik në Prishtinë në orën 09:30, në Amfiteatrin e Vogël të Fakultetit Juridik. Pas kësaj, kortezhi nis për në Gjakovë, ku në Varrezat e Qytetit parashihen homazhe në orën 14:00 dhe varrimi në orën 15:00.