Për nder të shënimit të Ditës së Çlirimit të Prishtinës, kryeqyteti do të organizojë një ndeshje festive futbollistike, e cila do të mbledhë figura të njohura nga sporti, media dhe jeta publike. Organizimi mundësohet nga Komuna e Prishtinës në bashkëpunim me Prishtina Tournament.
Në fushë do të përballen dy ekipe të udhëhequra nga futbollistët Milot Rashica dhe Fisnik Asllani, të cilët do të jenë kapitenë të mbrëmjes. Aktiviteti synon të shërbejë si një festë bashkimi për qytetarët, duke nderuar historinë e kryeqytetit përmes sportit dhe pranisë së personaliteteve të ndryshme.
Organizatorët kanë bërë të ditur se hyrja në stadiumin "Fadil Vokrri" për këtë ngjarje do të jetë pa pagesë. Pjesëmarrësit e tjerë që do t'u bashkohen kapitenëve në fushë pritet të shpallen nga organizatorët gjatë ditëve në vijim.