Në vitin 2025, në Kosovë u importuan 44.207 vetura, me vlerë rreth 651 milionë euro. Kjo shifër përfaqëson rritje mbi 16% krahasuar me 37.954 vetura të importuara në vitin 2024, sipas të dhënave zyrtare të Open Data të Doganës së Kosovës, të analizuara dhe përpunuara nga platforma AutoNet.
Veturat vazhdojnë të mbeten mallrat më të importuara në Kosovë çdo vit, me rritje të vazhdueshme dhe të madhe. Pjesa më e madhe, 90% ose 39.877 vetura, ishin të përdorura, kryesisht për shkak të çmimeve më të përballueshme. Vetëm 10% ishin të reja.
Llojet e motorëve
Analiza e tregut tregon se veturat me motor dizel vazhdojnë të dominojnë tregun e importeve, së bashku me ato me benzinë duke zënë afro 80%. Pjesëmarrja e veturave elektrike dhe PHEV-ve mbeti shumë e ulët, për shkak të mungesës së politikave stimuluese dhe infrastrukturës adekuate.
Automjetet për transport mallrash
Përveç veturave për pasagjerë, u importuan edhe automjete për transport mallrash. Në këtë segment, 98% ishin të përdorura, çka reflekton orientimin e bizneseve drejt zgjidhjeve më ekonomike për flotat e tyre.