Nëna e Liridona Ademajt i ka shprehur ngushëllime familjes së Arlinda Zekajt, e vrarë më 25 tetor në Vitomiricë të Pejës. Liridona u vra në nëntor të vitit 2023. Mesazhi i ngushëllimit u publikua nga vëllai i saj, Leonard Ademaj.
Në mesazh, nëna e Liridonës tha se lajmi për vrasjen e Arlindës ia riktheu dhimbjen për humbjen e vajzës së saj. Ajo u shpreh se e kupton dhimbjen e familjes, pasi edhe vetë ka humbur vajzën nga një krim.
“Ngushëllime nga zemra familjarëve të Arlindës. Si nënë që e kam përjetuar dhimbjen më të madhe në jetë, humbjen e vajzës sime nga krimi, e di mirë se çfarë do të thotë kur ta marrin fëmijën e ta copëtojnë zemrën përgjithmonë”, thuhet në mesazh.
Ajo shkroi se lajmi për vrasjen e Arlindës ia rihapi plagët shpirtërore dhe ia riktheu dhimbjen e humbjes.
“Kur e mora vesh se edhe një çikë e Kosovës, Arlinda, u bë viktimë e vrasjes, m’u rihapën plagët e shpirtit dhe m’u copëtua zemra prapë”, shkroi ajo.
Në fund të mesazhit, nëna e Liridonës tha se drejtësia e shpejtë mund t’u sjellë ngushëllim familjarëve të Arlindës.
“Vetëm drejtësia e shpejtë mund t’i ngushëllojë familjarët”, thuhet në mesazh.