Ish-presidentja Vjosa Osmani ka reaguar në lidhje me aktgjykimin për vrasjen e Liridonës Ademajt, ku u shpallën fajtorë Naim Murseli, Granit Plava dhe Kushtrim Kokalla. Naim Murseli, ish-partneri i viktimës, u dënua me burg të përjetshëm.
Në një postim në Facebook, Osmani shkroi se "sot drejtësia foli me zë të qartë dhe të prerë". Ajo nënvizoi se asnjë vendim nuk e kthen kohën prapa dhe nuk e rikthen Liridonën në jetë, por riafirmoi parimin se çdo cenim i jetës së grave kërkon përgjigjen më të fortë të drejtësisë.
Ky vendim, sipas saj, është një mesazh i qartë se dhuna ndaj grave nuk mund të relativizohet as të tolerohet. "Është shtytja e domosdoshme që jetët e grave të mbrohen dhe çdo rast dhune të merret seriozisht e të trajtohet në kohë", shtoi ajo.
Osmani shprehu solidaritet me familjen e Liridonës dhe me familjet e të gjitha grave e vajzave të vrarë për shkak të femicidit. "Për Liridonën. Për çdo grua që nuk arriti të mbijetojë. Dhe për çdo vajzë që meriton të rritet e lirë dhe pa frikë, drejtësia do të jetë përgjigja përherë, ndërsa parandalimi, mbështetja dhe fuqizimi do të jenë angazhimi ynë i përditshëm", përfundoi ajo.