Në protestën e zhvilluar këtë të shtunë, u shfaq edhe Nënë Liza, e cila është kthyer në një figurë simbolike për banorët e lagjes "5 Majit". Në fjalën e saj, ajo kërkoi largimin e kryeministrit Edi Rama, duke e akuzuar atë për nxjerrjen e qytetarëve nga banesat me dhunë në mes të dimrit.
Sipas Nënë Lizës, familjet e prekura nga këto ndërhyrje urbane po përballen me vështirësi të mëdha ekonomike, duke u detyruar të ndryshojnë disa herë banesat me qira. Ajo kritikoi gjithashtu politikën aktuale për pensionet, duke e vlerësuar rritjen prej 2000 lekësh si të pamjaftueshme përballë kostos së lartë të jetesës.
Gjatë tubimit, ajo akuzoi kreun e qeverisë për sjellje mosrespektuese ndaj qytetarëve, duke iu referuar deklaratave të mëparshme të kryeministrit, ku sipas saj shqiptarët janë etiketuar si "dele".
Protesta e 28-të me radhë mblodhi qytetarë nga disa zona të vendit, si dhe përfaqësues të diasporës shqiptare, të cilët kanë shprehur kundërshtinë e tyre ndaj vendimeve të ekzekutivit.