KESCO, në cilësinë e Furnizuesit të Shërbimit Universal, njofton se nga 1 prilli 2026 hyn në fuqi faza e dytë e liberalizimit të tregut të energjisë elektrike në Kosovë. Ky proces zbatohet në përputhje me Ligjin për Energjinë Elektrike dhe vendimet e Zyrës së Rregullatorit për Energji (ZRrE).
Konsumatorët komercialë me mbi 50 të punësuar ose qarkullim vjetor mbi 10 milionë euro nuk do të furnizohen më me tarifa të rregulluara nga KESCO. Bazuar në të dhënat e Administratës Tatimore të Kosovës, një numër biznesesh nuk i plotësojnë më kriteret për shërbimin universal.
Bizneset e prekura duhet të përzgjedhin një furnizues të licencuar dhe të nisin procedurën e ndërrimit së paku 21 ditë pune para hyrjes në fuqi të kontratës së re. Lista e furnizuesve të licencuar publikohet në faqen zyrtare të ZRrE-së.
Nëse nuk përzgjidhet furnizues me kohë, biznesi furnizohet përkohësisht nga Furnizuesi i Mundësisë së Fundit për deri në 60 ditë. Pas këtij afati, në mungesë të kontratës, furnizimi mund të ndërpritet sipas legjislacionit në fuqi.
Bizneset vetë-konsumatore (prosumatorë) njoftohen se përfundon skema aktuale me tarifa të rregulluara. Energjia e prodhuar trajtohet sipas kontratës me furnizuesin e zgjedhur.
KESCO fton bizneset që plotësojnë kriteret të konfirmojnë dhe raportojnë pranë saj njësitë dhe shifrat e konsumit për trajtim të saktë gjatë procesit.