Ministria për Evropën dhe Punët e Jashtme njofton se duke filluar nga 10 prilli 2026, qytetarët shqiptarë që udhëtojnë drejt 29 vendeve të hapësirës Shengen do të përballen me procedura të reja kufitare. Hyn në funksion të plotë Sistemi Evropian i Hyrjes/Daljes (EES), i cili zëvendëson vulosjen manuale të pasaportave me regjistrimin digjital të hyrjeve dhe daljeve për shtetasit jashtë Bashkimit Evropian.
Ky sistem, i zbatuar pjesërisht që nga tetori 2025, zbatohet për qëndrime afatshkurtra deri në 90 ditë brenda një periudhe 180-ditore. Rregulli i qëndrimit mbetet i pandryshuar.
Çfarë regjistrohet në hyrjen e parë
• të dhënat e pasaportës;
• fotografia e fytyrës;
• gjurmët e gishtërinjve.
Refuzimi për të dhënë të dhënat biometrike sjell refuzimin e hyrjes në territorin Shengen.
Këshilla për udhëtarët
Autoritetet paralajmërojnë për vonesa të mundshme në fazën fillestare në aeroporte, porte dhe pika kufitare tokësore. Qytetarëve u rekomandohet të paraqiten më herët, të verifikojnë vlefshmërinë dhe gjendjen fizike të pasaportave. Nuk kërkohet aplikim paraprak, pasi regjistrimi kryhet në momentin e kalimit kufitar.
Ministria u bën thirrje qytetarëve të informohen paraprakisht për procedurat e reja dhe të planifikojnë udhëtimet duke llogaritur kohën shtesë për kontrollet.
Përditësime
Nga 10 prilli 2026, Sistemi EES hyn në fuqi në hapësirën Schengen:
- Ruan të dhënat e hyrjeve dhe daljeve për 3 vjet.
- Fëmijët nën 12 vjeç përjashtohen nga dhënia e gjurmëve të gishtërinjve.
- Autoritetet i bëjnë udhëtarëve 4 pyetje të detyrueshme për adresën e qëndrimit dhe burimet financiare.