Ngërçi i zgjatur politik dhe mungesa e institucioneve të konsoliduara kanë ndikuar negativisht në pozicionimin ndërkombëtar të Kosovës. Sipas njohësve të çështjeve politike, ky boshllëk po krijon hapësirë që Serbia të zhvillojë fushata agresive kundër shtetësisë së Kosovës në forumet ndërkombëtare.
Drejtori i Institutit "POLCON", Fitim Mulolli, theksoi se pasiviteti diplomatik i Prishtinës sjell dëme të drejtpërdrejta për sovranitetin e vendit. Ai vlerësoi se, në mungesë të një përfaqësimi të mirëfilltë, Serbia gëzon një hapësirë të lirë për të vepruar kundër interesave të Kosovës pa hasur në kundërshtime. Mulolli shprehu shqetësimin se marrëdhëniet me aleatët strategjikë janë përkeqësuar, duke përmendur pezullimin e dialogut strategjik me SHBA-në dhe ngecjet e theksuara në proceset e integrimit në Bashkimin Europian.
Nga ana tjetër, analisti politik Jeton Halimi vlerësoi se diplomacia e Kosovës ka çaluar ndjeshëm kohët e fundit. Sipas tij, pas themelimit të institucioneve, detyra parësore e autoriteteve duhet të jetë rikthimi i marrëdhënieve të qëndrueshme me Shtetet e Bashkuara dhe Bashkimin Europian. Halimi nënvizoi gjithashtu se keqmenaxhimi i situatës në veri të vendit ka qenë një faktor tjetër që ka ndikuar në dobësimin e pozitës ndërkombëtare të vendit. Ekspertët bënë thirrje që institucionet të finalizohen sa më parë, duke marrë si shembull procedurat e shpejta të formimit të qeverisë në shtete me demokraci parlamentare, për të shmangur vakuumin institucional dhe pasojat e tij në politikën e jashtme.