Ceremonia e hapjes së edicionit të sivjetmë u mbajt në oborrin e Rektoratit, ku morën pjesë përfaqësues institucionalë, diplomatë, profesorë dhe studentë. Rreth 30 për qind e pjesëmarrësve janë studentë ndërkombëtarë, të cilët do të ndjekin ligjërata për tema si inteligjenca artificiale, trashëgimia kulturore, drejtësia, filozofia dhe ekonomia.
Rektori i Universitetit të Prishtinës, Arben Hajrullahu, vlerësoi se ky është eventi më i madh ndërkombëtar në universitetet shqipfolëse. Ai theksoi rolin e këtij programi në ndërtimin e urave të reja të bashkëpunimit akademik dhe kontributin për paqen dhe stabilitetin.
Në ngjarje morën pjesë edhe zëvendësministri i Arsimit, Përparim Kryeziu, si dhe shefi i sektorit politik të BE-së në Kosovë, Boguslaw Gertruda. Ky i fundit nënvizoi rëndësinë e investimit në rini dhe arsimin e lartë, duke përmendur programet si Erasmus+, Horizon Europe dhe Young Cell Scheme si mundësi kyçe për zhvillimin e kapaciteteve profesionale.
Programi synon të ofrojë përtej klasave të mësimit një mjedis për shkëmbim idesh dhe perspektivash të reja midis studentëve dhe stafit akademik nga vende të ndryshme të botës.