Duke filluar nga e hëna, më 29 qershor, Universiteti i Prishtinës (UP) do të çelë zyrtarisht konkursin për regjistrimin e studentëve të rinj në nivelin bachelor për vitin akademik 2026/2027. Institucioni më i madh publik i arsimit të lartë në Kosovë ka bërë të ditur se oferta akademike është ndërtuar duke u bazuar në kërkesat e tregut të punës dhe standardet e Agjencisë së Akreditimit.
Sipas prorektores për zhvillim institucional, cilësi dhe çështje studentore, Majlinda Gjelaj, për këtë vit janë planifikuar 5663 vende për studentët e rinj në 146 programe të studimit. Të gjitha programet janë rishikuar dhe riakredituar për të përmbushur nevojat e arsimit të lartë.
Një risi në politikat e pranimit për këtë vit është vendimi për të ndarë 4 për qind të kuotave të përgjithshme për aplikuesit që vijnë nga jashtë Kosovës. Kjo kategori përfshin:
• Diasporën shqiptare;
• Arbëreshët e Italisë;
• Arbneshët e Zarës;
• Shqiptarët me prejardhje nga Kosova që jetojnë jashtë vendit.
Sipas drejtuesve të universitetit, kjo praktikë zbatohet për herë të parë me qëllim të krijimit të mundësive për këto grupe, nismë kjo që nuk ka qenë pjesë e proceseve të mëparshme të pranimit.