Pamjet nga plazhi i Vlorës në fillim të marsit nuk janë arkiva nga sezoni veror i kaluar. Ato tregojnë vizitorë që marrin banjo dielli dhe lahen në det.
Për besnikët e detit, sezoni nuk përfundon kurrë. Mjafton mungesa e reshjeve për t'i gjetur çdo ditë në ujë.
Nuk mungojnë turistët e huaj që kthehen e rikthehen në Vlorë. Njëri prej tyre, nga Teksasi i Shteteve të Bashkuara të Amerikës, thotë: "Unë vij nga Teksasi, i Shteteve të Bashkuara të Amerikës. Kjo është hera e 10-të që vij këtu. Më pëlqen më shumë ushqimi, njerëzit dhe natyrisht ky deti që është i mrekullueshëm. Deti është pak i ftohtë, por shumë i mirë për mua. Unë notoj çdo ditë, madje edhe kur ka shi. Kam qenë kudo në Shqipëri, nga Thethi në Sarandë. Të them të drejtën, Vlora më pëlqen shumë. Sigurisht që do të kthehem këtu sërish".
Temperaturat në rritje dhe ditët me diell premtojnë shtim të fluksit të vizitorëve vendas dhe të huaj përgjatë bregdetit të Vlorës.