Një ngjarje e rëndë ka ndodhur në zonën e Gjoricës në bashkinë Bulqizë, ku pesë të afërm, të cilët ishin futur për t'u larë në lumin Drin, u përfshinë nga rryma e ujit. Incidenti dyshohet se ndodhi për shkak të rritjes së menjëhershme të nivelit të lumit, pas hapjes së portave të një hidrocentrali në Dibër të Madhe.
Pas njoftimit të autoriteteve nga ana e familjarëve rreth orës 21:00, forcat e Policisë së Bulqizës mbërritën në vendngjarje. Pas një operacioni kërkim-shpëtimi që zgjati rreth katër orë, shërbimet mundën të nxjerrin të gjallë katër prej personave. Përpjekjet për gjetjen e një vajze rreth 7 vjeçe, e cila dyshohet se është marrë nga rrjedha, vazhdojnë ende.
Në operacionin e kërkimit janë angazhuar shërbime policore, familjarë, banorë të zonës dhe punonjës të bashkisë. Autoritetet vijojnë punën për zbardhjen e plotë të rrethanave të ngjarjes.
Përditësime
Grupi i kërkim-shpëtimit gjeti trupin e pajetë të 7-vjeçares paraditen e sotme. Viktima u lokalizua poshtë urës së lumit Drin, në zonën e Gjoricës së Poshtme. Trupi është dërguar në morg për ekspertizën mjeko-ligjore, ndërsa autoritetet po vazhdojnë hetimet për zbardhjen e rrethanave të ngjarjes.