Kryetari i Qytetit të Shkupit, Orce Gjorgjievski, ka bërë të ditur një nismë të re për vitin e ardhshëm arsimor, përmes së cilës çdo nxënës që regjistrohet në vitin e parë të shkollave të mesme do të marrë një uniformë pa pagesë. Kjo është hera e parë që një masë e tillë zbatohet në këtë nivel arsimor në kryeqytet.
Sipas Gjorgjievskit, qëllimi kryesor i këtij vendimi është zbutja e pabarazive ekonomike ndërmjet të rinjve, duke krijuar një ambient shkollor më egalitar dhe më të sigurt. Ai theksoi se shkolla duhet të mbetet një hapësirë ku nxënësit konkurrojnë me dije dhe rezultate akademike, e jo në bazë të veshjeve të shtrenjta apo statusit financiar të familjeve të tyre.
“Dallimet sociale shpesh bëhen shkak për ndarje, diskriminim, madje edhe bullizëm. Prandaj po vendosim këtë masë, me të cilën krijojmë një mjedis më të barabartë, më të sigurt dhe më të këndshëm për të gjithë nxënësit”, u shpreh kryetari i Bashkisë.
Përveç nxitjes së një mjedisi më gjithëpërfshirës, nisma pritet të lehtësojë ngarkesën financiare për familjet e nxënësve, duke u krijuar këtyre të fundit mundësi më të mira për t'u përqendruar te zhvillimi personal dhe procesi mësimor.