Oda Ekonomike Amerikane në Kosovë ka zhvilluar një tryezë diskutimi me temën “Nga Debati për Politika te Hapat Praktikë: Qasja në LNG, Gatishmëria e Bizneseve dhe Siguria Energjetike e Kosovës”. Gjatë takimit, u vlerësua se gazi natyror shërben si mundësi shtesë për diversifikimin e burimeve energjetike dhe si element kyç për industrializimin e vendit.
Drejtori ekzekutiv i Odës, Arian Zeka, theksoi se çështja e gazit amerikan është rikthyer në debat pas disa vitesh, duke kujtuar vitin 2021, kur Qeveria e Kosovës dha përgjigje negative për programin e infrastrukturës së gazit të lëngshëm. Sipas Zekës, ndërsa në të kaluarën arsyetimet lidheshin me natyrën e gazit, sot qeveria i referohet kostove dhe fizibilitetit. Ai shprehu shqetësimin se përfaqësuesit e institucioneve shtetërore po mungojnë në tryeza të tilla debati.
Ekspertja e energjisë, Laura Kryeziu, e cila ka shërbyer më parë si koordinatore nacionale për këtë projekt, vlerësoi se diskutimet aktuale janë të vonuara. Sipas saj, vonesat në trajtimin e këtyre projekteve kanë sjellë humbjen e mundësive të rëndësishme për zhvillim, duke e ndërlidhur këtë situatë me projekte të mëhershme të energjisë.
Përditësime
Në panelin e organizuar nga Oda Ekonomike Amerikane, pjesëmarrësit diskutuan mbi ndikimin e gazit në sigurinë kombëtare dhe marrëdhëniet strategjike me SHBA. Panelisti Pleurat Hundozi theksoi se gazi duhet të trajtohet si burim shtesë energjetik dhe jo si zëvendësues. Në këtë debat, që shënon vazhdimësinë e forumit të muajit të kaluar, morën pjesë edhe Dardan Sejdiu, Learta Hollaj dhe Shaqir Palushi.