Në selinë e Odës së Mjekëve të Kosovës është vendosur një flamur gjigant me mbishkrimin “Liria ka emër”, në shenjë nderimi dhe respekti për çlirimtarët e vendit. Ky gjest është ndërmarrë gjashtë ditë para shpalljes së verdiktit nga Gjykata në Hagë për ish-krerët e UÇK-së, përkatësisht për Hashim Thaçin, Kadri Veselin, Jakup Krasniqin dhe Rexhep Selimin.
Nëpërmjet një njoftimi zyrtar, institucioni që udhëhiqet nga dr. Pleurat Sejdiu theksoi rëndësinë e ruajtjes së kujtesës për sakrificën e atyre që kontribuuan për lirinë e Kosovës. Oda shprehu qëndrimin se po e pret vendimin me shpresë dhe besim në drejtësi, duke theksuar se e vërteta dhe dinjiteti mbeten vlerat kryesore në këtë periudhë të rëndësishme për historinë e vendit.
Vendosja e këtij flamuri në fasadën e objektit të Odës së Mjekëve i është bashkuar një sërë aktivitetesh simbolike që po zhvillohen në Kosovë në prag të këtij procesi gjyqësor. Përveç këtij gjesti, është njoftuar se më 12 shtator, duke filluar nga ora 14:00, në sheshin “Skënderbeu” në Prishtinë do të mbahet Marsh për Liri, si pjesë e angazhimeve qytetare për të mbështetur ish-liderët e UÇK-së.