Platforma Liria ka Emër ka publikuar një video me karakter simbolik për të shprehur mirënjohjen ndaj kontributit të ish-krerëve të UÇK-së për lirinë e vendit. Në pamjet e publikuara shfaqet një helikopter, ndërsa fokusi vihet te një bluzë që mban mbishkrimin Liria ka Emër dhe fotografitë e katër krerëve të UÇK-së.
Mesazhi i përcjellë përmes kësaj videoje u drejtohet atyre që dhanë gjithçka për lirinë e Kosovës, për brezat e tanishëm dhe ata të ardhshëm. Përmbajtja e mesazhit thekson: “Ju që dhatë gjithçka për Kosovën. Për lirinë tonë. Për ne. Për fëmijët tanë. Për fëmijët që do të lindin edhe pas 100 vjetësh”.
Në përmbyllje të videos, platforma përcjell mesazhin se shteti i Kosovës është i lirë, krenar dhe mirënjohës ndaj kontribuuesve të saj, duke përfunduar me thirrjen: “Kosova ju pret. E lirë. Krenare. Mirënjohëse. Kosova ju pret në shtëpi!”. Ky publikim ndodh ndërkohë që vëmendja publike është përqendruar te procesi gjyqësor dhe pritja e vendimit për ish-drejtuesit e UÇK-së.