Oda Ekonomike Amerikane në Kosovë ka shprehur shqetësim lidhur me vendimin e Qeverisë në detyrë për ndarjen e mjeteve financiare për disa kategori, përfshirë pagesa njëherëshe prej 100 eurosh për pensionistë, fëmijë, studentë dhe sektorin jopublik.
Në reagimin e publikuar më 22 maj 2026, oda thekson se mbështetja e kategorive të cenueshme dhe ruajtja e fuqisë blerëse përbëjnë objektiva të rëndësishme, por masat e përkohshme ofrojnë vetëm lehtësim afatshkurtër. Sipas odës, këto masa nuk adresojnë faktorët e nevojshëm strukturorë për zhvillim të qëndrueshëm ekonomik.
Oda vlerëson se stimulimi i konsumit afatshkurtër rrezikon të prodhojë ndikim të kufizuar afatgjatë, sidomos në ekonominë e Kosovës, ku rritja e konsumit shpesh përkthehet në rritje të importeve dhe jo në shtim të prodhimit vendor. Masat e tilla kufizojnë gjithashtu disponueshmërinë e fondeve publike për iniciativa me ndikim më të madh ekonomik.
Në vend të pagesave të njëhershme, oda rekomandon zhvendosje të fokusit drejt investimeve strategjike në infrastrukturën e transportit dhe të energjisë, infrastrukturën digjitale, arsim dhe zhvillim të fuqisë punëtore. Fuqizimi i sektorit privat, sipas odës, krijon mundësi më të qëndrueshme punësimi dhe rritje të produktivitetit.