Policia e Lezhës ka finalizuar operacionin e koduar “Perimetri 2”, i zhvilluar për goditjen e shpërndarjes së lëndëve narkotike dhe organizimit të kundërligjshëm të lojërave të fatit në qytetin e Laçit.
Si rezultat i operacionit u arrestuan 7 persona. Gjatë aksionit u sekuestruan lëndë narkotike Cannabis Sativa, 6 automjete, telefona celularë dhe 7 pajisje elektronike të përdorura për lojëra fati.
Hetimet zgjatën disa muaj dhe u kryen me metoda speciale pas informacioneve operative. Sipas policisë, lënda narkotike ndahej në doza dhe shitej në zona të ndryshme të Laçit, në disa raste edhe pranë shkollave. U dokumentua veprimtaria kriminale e grupit të dyshuar, duke çuar në ndalimin e 4 personave dhe arrestimin në flagrancë të 2 të tjerëve, të gjithë banues në Laç, Kurbin. Ata akuzohen për veprën penale “Prodhimi dhe shitja e narkotikëve”, kryer në bashkëpunim.
Gjatë kontrolleve policia zbuloi një lokal ku organizoheshin lojëra fati me kompjuterë në kundërshtim me ligjin. U arrestua pronari i lokalit, i cili nuk e kishte regjistruar subjektin dhe punonjësit pranë organeve kompetente. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë.
Përditësime
Policia e Shtetit arrestoi shtatë persona gjatë operacionit “Perimetri 2” në Laç për narkotikë dhe lojëra fati. Të arrestuarit janë Kol Stojani, Fatjon Piscaku, Elson Piscaku, Bruno Dungaj, Xhulio Marku, Fatjon Fufi dhe Ermir Stojani. Njësitë e përfshira janë Sektori për Hetimin e Narkotikëve, Seksioni i Mbështetjes Operacionale, Sektori i Forcës së Posaçme “Shqiponja” i DVP Lezhë dhe FNSH Tiranë.