Policia e Drejtorisë Vendore të Policisë Durrës finalizoi operacionin e koduar Cleaning 4 për goditjen e aktivitetit kriminal të shitjes së lëndëve narkotike pranë shkollave në qytetin e Kavajës.
Si rezultat i operacionit u arrestuan 9 shtetas dhe u shpallën në kërkim 3 të tjerë. Të arrestuarit janë të moshave 20 deri në 48 vjeç dhe banues në Kavajë.
Operacioni u krye nga Seksioni për Hetimin e Narkotikëve, Forca e Posaçme Shqiponja dhe Forca Operacionale e DVP Durrës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Durrës.
Hetimet kishin filluar disa muaj më parë me metoda speciale, mbi bazën e informacioneve operative. Gjatë aksionit u sekuestruan sasi të lëndëve narkotike kokainë dhe kanabis, të ndara në doza, si dhe disa telefona celularë.
Gjykata caktoi masën e sigurisë Arrest në burg për 9 nga 12 personat e proceduar. Materialet procedurale iu referuan Prokurorisë së Durrësit për veprime të mëtejshme hetimore. Policia vijon punën për lokalizimin e personave të shpallur në kërkim.