Policia e Durrësit finalizoi operacionin policor të koduar "Shije e hidhur", duke zbuluar një bazë përpunimi dhe duke goditur grupin që prodhonte e shpërndante lëndë narkotike sintetike në formë xhelatine ose karameleje pranë shkollave të mesme.
Në pranga ranë shtetasit L. L., 20 vjeç, dhe R. L., 25 vjeç, të dy lindur në Kavajë e banues në Tiranë. U shpall në kërkim bashkëpunëtori i tyre, Xh. L., 20 vjeç, banues në Tiranë, për të cilin vijojnë kërkimet intensive.
Sipas hetimeve, të dyshuarit kishin krijuar kushtet për prodhimin, transportimin dhe shitjen e lëndës narkotike, kryesisht te moshat adoleshente. Secili kishte rol të caktuar në aktivitetin e jashtëligjshëm.
Gjatë kontrollit ndaj L. L. pranë bllokut të shkollave, shërbimet policore gjetën e sekuestruan 50 paketime me lëndë narkotike në formë karameleje, me peshë 650 gramë.
Në banesën e tyre në Tiranë u sekuestruan xhelatine në formë karameleje, lëndë narkotike kanabis, 550 gramë material sintetik i gatshëm për prodhim, një peshore elektronike, kallëpe plastike për formimin e karameleve si dhe përbërës të tjerë ndihmës.
Operacioni u zhvillua nga Seksioni për Hetimin e Narkotikëve në bashkëpunim me Seksionin për Mbështetjen Operacionale të Hetimit pranë Drejtorisë Vendore të Policisë Durrës, në kuadër të prioriteteve për sigurinë e nxënësve dhe parandalimin e narkotikëve.
Vijojnë hetimet për identifikimin e personave të tjerë të përfshirë. Ndaj të arrestuarve rëndon vepra penale "Prodhimi dhe shitja e narkotikëve", në bashkëpunim. Materialet do t’i referohen Gjykatës së Shkallës së Parë të Juridiksionit të Përgjithshëm Durrës.
Përditësime
Ledio Lemeti (L. L., 20 vjeç) dhe Rubin Lemeti (R. L., 25 vjeç) janë dy vëllezërit e arrestuar. Policia e Shtetit konfirmoi sekuestrimin e materialeve në banesën e Ledio Lemetit në Tiranë.