Operatorët e televizioneve në Tiranë zhvilluan sot një protestë simbolike para Gjykatës së Tiranës dhe SPAK-ut, duke ulur kamerat përtokë dhe duke refuzuar të filmonin përfaqësuesit e Partisë Demokratike. Ky veprim erdhi në solidaritet me operatorin e News24, Aldo Kashri, i cili u lëndua gjatë protestës kombëtare të opozitës më 10 shkurt.
Gjatë raportimit live nga terreni, drejt Aldo Kashrit u hodh një bombë molotov, e cila shpërtheu dhe i ndezën rrobat. Falë reagimit të menjëhershëm të kolegëve, ai shpëtoi pa pasoja të rënda dhe pësoi vetëm djegie të lehta në duar, si dhe disa lëndime të tjera.
Solidarizimi ndodhi në ambientet e gjykatës, ku zhvillohej seanca për caktimin e masave të sigurisë ndaj protestuesve të arrestuar. Operatorët vendosën të mos filmonin as përfaqësuesit e PD-së, as gjyqin, duke theksuar simbolikisht se jeta e gazetarëve është më e shenjtë se pajisjet e tyre.
Ngjarja ka nxjerrë në pah çështjen e sigurisë së punonjësve të medias gjatë mbulimit të protestave të tensionuara.