Grupi Parlamentar i Partisë Demokratike, Partia e Lirisë dhe grupi parlamentar Aleanca për Ndryshim kanë zyrtarizuar kërkesën e tyre të përbashkët për ngritjen e një komisioni hetimor parlamentar. Nisma ndërmerret pas publikimit të disa audiopërgjimeve nga ish-zëvendëskryeministri Arben Ahmetaj, i cili pretendon përfshirjen e biznesmenit izraelito-amerikan Ron Yeffet në një plan për trafik armësh dhe municionesh përmes kompanisë KAYO.
Objektivat kryesore të këtij komisioni, sipas kërkesës së opozitës, përfshijnë:
• Kontrollin e ligjshmërisë së marrëveshjeve të bashkëpunimit midis KAYO sh.a. dhe palëve të treta.
• Verifikimin e procesit të përzgjedhjes dhe negocimit të marrëdhënieve kontraktuale.
• Hetimin e veprimtarisë së kompanisë mëmë dhe shoqërive bija në fushën e prodhimit, importit, eksportit dhe tregtimit të pajisjeve ushtarake.
• Kontrollin e procedurave për përdorimin e fondeve nga Buxheti i Shtetit.
• Vlerësimin e detyrimeve që rrjedhin nga Traktati i Atlantikut të Veriut (NATO).
Sipas opozitës, kërkesa është paraqitur për shkak të implikimeve të mundshme për sigurinë kombëtare dhe detyrimet ndërkombëtare të Republikës së Shqipërisë. Synimi është përcaktimi mbi bazën e fakteve dhe dokumenteve nëse institucionet shtetërore kanë përmbushur detyrimet e tyre ligjore në lidhje me parandalimin e veprimtarive të paligjshme. Opozita kërkon gjithashtu që drejtimi i këtij komisioni t'i takojë Partisë Demokratike.
Përditësime
Kërkesa për ngritjen e komisionit është formalizuar me firmat e 41 deputetëve të opozitës. Propozimi parashikon një komision me 15 anëtarë, i cili do të ushtrojë mandatin e tij për një periudhë 6-mujore.
Deputeti Klevis Balliu zgjeroi kërkesën për hetim parlamentar duke përfshirë zyrtarisht emrin e Ron Yeffet. Opozita kërkon zbardhjen e lidhjeve të mundshme mes Yeffet, dosjes së AKSHI-t dhe kompanisë Timak Horse Club, e themeluar në mars 2026. Gjithashtu, kërkesa kërkon hetime mbi raportet mes Ron Yeffet, Ergys Agasit dhe kompleksit Equos Resort në Petrelë.