Shtatë deputetë të Partisë Demokratike kanë kërkuar interpelancë urgjente në Kuvend me ministrin e Mbrojtjes Ermal Nufi, lidhur me krijimin, funksionimin dhe marrëdhëniet kontraktuale të kompanisë shtetërore KAYO sh.a.. Kërkesa u dërgua kryetarit të Kuvendit Niko Peleshi më 8 prill 2026.
Kërkesa firmoset nga deputetët Flamur Noka, Jorida Tabaku, Bledion Nallbati, Elda Hoti, Klevis Balliu, Ledina Aliolli dhe Gazment Bardhi. Deputetët ngrenë shqetësime për mungesën e transparencës në marrëdhëniet e KAYO-së me partnerë privatë në industrinë ushtarake, përfshirë bashkëpunime ku shoqëria shtetërore mban pjesë minoritare.
KAYO sh.a. u krijua me ligjin nr. 88/2024 "Për krijimin e shoqërisë shtetërore për prodhimin dhe tregtimin e armëve, municioneve, pajisjeve dhe teknologjive ushtarake". Kjo shoqëri ka për qëllim prodhimin, demilitarizimin dhe tregtimin e produkteve ushtarake.
Në fokus janë kompanitë e përbashkëta si TIMAK Defence, përfshirja e biznesmenit izraelit Ron Yeffet, si dhe marrëdhëniet me kompaninë izraelite Elbit Systems. Opozita kërkon verifikime për rolin e Yeffet-it, lidhjet e tij, si dhe detaje mbi një marrëveshje të mundshme për furnizime ushtarake dhe investime, ku mungon transparenca për vlerën dhe financimin.
Në total, kërkesa përmban 22 pyetje që prekin rolin e ministrit, përzgjedhjen e partnerëve, procedurat kontraktuale, kontrollin parlamentar dhe rreziqet për sigurinë kombëtare. Deputetët theksojnë nevojën për sqarim të plotë publik nga Ministria e Mbrojtjes, për shkak të ndjeshmërisë së sektorit të mbrojtjes dhe implikimeve financiare e të sigurisë.