Nisma “Ora e Pritjes”, e cila shënon kohën deri në përfundimin e procesit gjyqësor ndaj ish-drejtuesve të Ushtrisë Çlirimtare të Kosovës (UÇK) në Hagë, është shtrirë për herë të parë jashtë kufijve të Kosovës. Ky aktivitet është vendosur tashmë në qendër të qytetit të Dyseldorf-it në Gjermani.
Sipas organizatorit Hektor Beqiri, përzgjedhja e këtij qyteti lidhet me frekuentimin e lartë të aeroportit të Dyseldorf-it nga familjarët e të akuzuarve, pasi shërben si pikë kyçe tranziti për udhëtimet drejt Holandës. Iniciativa përfaqëson pritjen e mërgatës për kthimin në atdhe të Hashim Thaçit, Kadri Veselit, Jakup Krasniqit dhe Rexhep Selimit.
Numërimi mbrapsht, i cili ka nisur zyrtarisht, është parashikuar të zgjasë deri më 16 shtator. Organizatorët kanë njoftuar se ky mesazh mbështetjeje pritet të përcillet në të ardhmen edhe në qytete të tjera të Evropës, me qëllim mobilizimin e komunitetit shqiptar dhe shprehjen e solidaritetit ndaj ish-krerëve të UÇK-së që po përballen me proceset në Hagë.