Aktivitetet në mbështetje të ish-krerëve të Ushtrisë Çlirimtare të Kosovës, të cilët po gjykohen në Hagë, janë shtrirë në disa komuna të Kosovës përmes nismës së njohur si “Ora e Pritjes”. Në Malishevë, në këtë aktivitet morën pjesë përfaqësuesit e platformës “Liria Ka Emër”, Ismail Tasholli dhe Eliza Hoxha, së bashku me qytetarë dhe përfaqësues lokalë. Gjatë këtij organizimi, u theksua se ky numërim mbrapsht simbolizon besimin dhe solidaritetin për çlirimtarët, duke bartur mesazhin e përbashkët se Kosova pret drejtësi dhe liri për ta.
Paralelisht, nisma është lansuar edhe në Komunën e Rahovecit, ku u vendos ora që shënon kohën deri në shpalljen e aktgjykimit më 16 shtator. Ky aktivitet është pjesë e përpjekjeve të vazhdueshme të platformës për të mbajtur gjallë mbështetjen qytetare për ish-krerët e UÇK-së.
Këto aktivitete shërbejnë si parapërgatitje për Marshin për Liri, i cili është planifikuar të mbahet më 12 shtator, duke filluar nga ora 14:00, në sheshin “Skënderbeu” në Prishtinë. Pritet që qytetarë nga e gjithë Kosova të bashkohen në këtë marsh për të shprehur përkrahjen e tyre ndaj të akuzuarve në Hagë.
Përditësime
Nisma Ora e Pritjes ka shtrirë aktivitetin e saj përtej kufijve të Kosovës, duke përfshirë tashmë edhe qytetin e Dusseldorfit në Gjermani. Hektor Beqiri është identifikuar si organizatori kryesor i këtij aktiviteti në qytetin gjerman, i cili synon sensibilizimin e mërgatës për zhvillimet rreth procesit gjyqësor në Hagë.