Në qytetin e Skenderajt është shënuar mbrëmë fillimi i "Orës së Pritjes", një fushatë numërimi mbrapsht drejt datës 16 shtator, e cila po organizohet nëpër komunat e Republikës së Kosovës nën moton "Kosova po pret". Ky aktivitet vjen si nismë e platformës qytetare "Liria ka Emër" në bashkëpunim me institucionet lokale, me qëllim shprehjen e mbështetjes për krerët e UÇK-së që po gjykohen në Hagë.
Kryetari i Komunës së Skenderajt, Sami Lushtaku, gjatë fjalës së tij e cilësoi këtë nismë si një mesazh përkushtimi ndaj vlerave të luftës dhe drejtësisë. Ai u shpreh se Drenica mbetet e palëkundur në mbështetje të çlirimtarëve, duke theksuar besimin në një proces gjyqësor të drejtë.
Përfaqësuesi i platformës "Liria ka Emër", Ismail Tasholli, deklaroi se ky organizim shërben për të bashkuar zërin e qytetarëve në një kërkesë të përbashkët për liri. Ndërkohë, përfaqësuesja tjetër e kësaj nisme, Eliza Hoxha, u bëri thirrje qytetarëve për pjesëmarrje sa më masive në "Marshin për Liri", i cili është planifikuar të mbahet më 12 shtator në Prishtinë. Ky marshim, i cili pritet të jetë një nga ngjarjet më të mëdha të këtij lloji në vend, synon të shërbejë si një manifestim paqësor për të kërkuar drejtësi, pak ditë përpara se të merret vendimi përfundimtar nga gjykata ndërkombëtare më 16 shtator.
Përditësime
Komuna e Prishtinës shprehu mbështetjen zyrtare për Marshin për Liri. Institucioni vendosi një baner në objektin e komunës me mesazhin 'Në emër të qytetarëve të Prishtinës – shpalleni të pafajshëm!'. Kryetari Përparim Rama dhe nënkryetarja Besianë Musmurati konfirmuan zyrtarisht përkrahjen për këtë organizim. Marshi fillon më 12 shtator, në orën 14:00, në sheshin 'Skënderbeu'.
Nisma 'Ora e Pritjes' po shtrihet përtej Skenderajt në komunat e Vushtrrisë, Vitisë dhe Prizrenit. Platforma 'Liria ka Emër' ka konfirmuar gjithashtu organizimin e 'Natës së Pritjes' në Hagë, e cila do të nisë më 15 shtator në orën 22:00 dhe do të zgjasë deri në orën 10:00 të mëngjesit të 16 shtatorit. Ky organizim po realizohet në bashkëpunim të ngushtë me përfaqësues të mërgatës, me qëllim mobilizimin në prag të vendimit të gjykatës ndërkombëtare.