Misioni i OSBE-së në Kosovë ka reaguar lidhur me vendimin e fundit të Këshillit Gjyqësor të Kosovës (KGJK) për të liruar nga detyra gjyqtarët dhe punonjësit administrativë serbë, të cilët kishin dhënë dorëheqje në vitin 2022. Ushtruesja e detyrës së Presidentit, Albulena Haxhiu, njoftoi se institucionet gjyqësore nuk kanë pranuar kërkesat e këtij personeli për tërheqjen e dorëheqjeve të tyre.
Në reagimin e tij, OSBE-ja ka inkurajuar KGJK-në që të ndërmarrë veprime të shpejta për të mbushur vendet vakante në sistemin e drejtësisë. Misioni theksoi se ky proces duhet të zhvillohet përmes procedurave transparente, gjithëpërfshirëse dhe të bazuara në meritë për rekrutim dhe emërim.
Sipas OSBE-së, ky veprim është thelbësor për të garantuar përputhshmërinë me kornizën kushtetuese dhe ligjore në fuqi. Një theks i veçantë u vu te rëndësia e përfaqësimit të komuniteteve në institucionet gjyqësore. OSBE-ja vlerëson se një sistem gjyqësor që pasqyron komunitetet të cilave u shërben, është thelbësor për të siguruar qasje të barabartë dhe efektive në drejtësi për të gjithë qytetarët.
Përditësime
Bashkimi Evropian shprehu keqardhje të thellë për vendimin e Këshillit Gjyqësor të Kosovës (KGjK) për pranimin e dorëheqjeve të gjyqtarëve serbë. BE e vlerësoi këtë vendim si të papajtueshëm me ligjin dhe standardet e sundimit të ligjit. KGjK miratoi pranimin e dorëheqjeve me 9 vota pro, 1 kundër dhe 1 abstenim. Anëtari i KGjK-së, Artan Abazi, kundërshtoi vendimin duke argumentuar se gjyqtarët kanë humbur aftësitë profesionale gjatë 4 viteve të fundit dhe janë angazhuar në aktivitete politike.