Presidentja e Kosovës Vjosa Osmani ka përkujtuar viktimat e masakrës së Belegut në 27-vjetorin e saj.
Sipas mesazhit të saj, më 29 mars 1999, në oborrin e një shtëpie në Beleg të Deçanit, forcat policore, ushtarake dhe paramilitare të regjimit të Serbisë ndanë burrat dhe të miturit nga gratë, duke ekzekutuar 46 civilë shqiptarë.
Osmani deklaroi se këta civilë u masakruan vetëm pse kërkonin të jetonin të lirë në tokën e tyre. Në këtë përvjetor, ajo u përul me nderim para jetëve të ndërprera padrejtësisht dhe ndaj dhimbjes së familjeve që ende mbajnë plagët e asaj dite.
Ajo theksoi se kujtimi për ta është zotim që këto krime të mos harrohen kurrë dhe që drejtësia të triumfojë. Osmani përfundoi duke u lutur që kujtimi për të rënët për liri të jetë i përjetshëm, duke nënvizuar rëndësinë e memorjes historike dhe të drejtësisë.