Ish-presidentja Vjosa Osmani ka deklaruar se nuk ka kërkuar që të jenë katër emra në top dhjetëshen e Listës së LDK-së për zgjedhjet e jashtëzakonshme të 7 qershorit.
E pyetur për mënyrën e kandidimit të saj si presidente apo deputete, ajo u shpreh se çdo vendim do të bëhet i ditur në kohën e duhur.
"Nuk është mirë me spekulu. Unë nuk kam kërkuar kurrë asnjë pozitë nga askush", tha Osmani.
"Kurdo që kemi diçka për t’ju thënë, do t’ju themi", shtoi ajo.
Osmani theksoi se do të vazhdojë angazhimin me qytetarët, duke përmendur aktivitetet e përbashkëta me Farije Hotin në terren.
"Me Farije Hotin bashkë te qytetarët", u shpreh ajo.
Sa i përket kundërshtimeve nga disa ish-deputetë të LDK-së për rikthimin e saj në politikë, Osmani nënvizoi se fokusi i saj është te qytetarët.
"Do të jem para qytetarëve. Deri sot në të gjithë angazhimin tim politik janë ata që ma kanë dhënë forcën dhe edhe tash e tutje do të jetë njësoj", deklaroi ajo.
Përditësime
LDK mblodhi strukturat e partisë këtë të martë për të diskutuar sfidën elektorale dhe përfshirjen e Osmanit në lista.
Kthimi i Osmanit në LDK nuk është ende zyrtarizuar, pavarësisht deklaratës së Abdixhikut se do të angazhohet personalisht për të hapur dyert e partisë.