Presidentja e Republikës së Kosovës Vjosa Osmani ka nënshkruar sot në Davos të Zvicrës Kartën e Bordit të Paqes, duke e bërë Kosovën anëtare themeluese, të barabartë dhe me të drejta të plota, krah për krah me Shtetet e Bashkuara të Amerikës.
Në një postim në Facebook, Osmani shkroi: "Kur Amerika udhëheq, paqja është gjithmonë më e sigurt!". Ajo theksoi se anëtarësimi në organizata ndërkombëtare të paqes, të udhëhequra nga aleati strategjik i Kosovës, fuqizon sovranitetin dhe pozicionin ndërkombëtar të vendit, si dhe është në interesin më të lartë të Republikës së Kosovës.
Marrëveshja do t’i dërgohet Kuvendit të Kosovës për ratifikim, në përputhje me Kushtetutën, për të marrë miratimin final nga përfaqësuesit e popullit. Osmani falënderoi presidentin e SHBA-së, Donald Trump, për lidershipin e tij dhe për ftesën personale që ta përfaqësojë Kosovën në këtë ceremoni.
Sipas postimit, Kosova do të jetë në shërbim të paqes sot e përherë. Ceremonia u zhvillua në kuadër të aktiviteteve ndërkombëtare në Davos, ku Osmani takoi Trump-in gjatë themelimit të Bordit të Paqes. Ajo shoqëroi postimin me fotografi nga ngjarja.
Përditësime
Kosova është ndër 20 shtetet themeluese të Bordit të Paqes.
Në intervistë për RTK, Osmani deklaroi:
- Morëm vlerësim direkt nga Donald Trump dhe SHBA;
- Kemi ndjenjë të fortë përkatësie ndaj SHBA;
- E konsideron organizatën si njërën nga më të rëndësishmet në historinë moderne;
- Përvoja e Kosovës shërben si model për shtetndërim dhe paqe.
Presidentja Vjosa Osmani mori ftesë më 20 janar nga Presidenti Trump dhe Shtëpia e Bardhë.
- Osmani nuk kishte planifikuar udhëtim në Davos, por udhëtoi menjëherë pas ftesës.
- Ajo pritet të kthehet në Kosovë menjëherë pas mesnatës.
- E cilësoi ditën si "me peshë historike" për Kosovën dhe shtetet pjesëmarrëse.
Osmani, pas nënshkrimit të Kartës së Bordit të Paqes në Davos, deklaroi para mediave ndërkombëtare: "Besoj fuqishëm në lidershipin e presidentit Trump dhe ekipit të tij. Kjo është për të shpëtuar jetë. Paqja nuk është gjithmonë e lehtë për ta arritur, por mund të mundësohet me bashkimin e të gjithëve."
Ai shtoi se Bordi i Paqes mund ta sjellë paqen në vendet ku nevojitet, më pak kompleksisht se OKB-ja.
Bordi i Paqes publikoi listën e plotë të shteteve themeluese: Bahrein, Argjentina, Armenia, Azerbajxhan, Belgjika, Bullgari, Egjipt, Hungaria, Indonezia, Jordani, Kazakistan, Mongoli, Pakistan, Paraguaj, Katar, Arabia Saudite, Turqi, Emiratet e Bashkuara Arabe, Uzbekistan (përveç Kosovës dhe SHBA-së).
Analisti Vesel Makolli deklaroi se Kosova është produkt i SHBA-së dhe NATO-s, ndërsa shtetet e vogla mbijetojnë falë lidershipit të mençur dhe rreshtimit gjeopolitik.