Presidentja e Republikës së Kosovës, Vjosa Osmani, priti në takim ambasadorin e Republikës Federale të Gjermanisë në Kosovë, Rainer Rudolph.
Gjatë takimit u diskutuan zhvillimet e fundit politike në vend, si dhe bashkëpunimi i ngushtë ndërmjet Kosovës dhe Gjermanisë. Presidentja Osmani vlerësoi marrëdhëniet e shkëlqyera ndërmjet dy shteteve dhe shprehu mirënjohjen e thellë të popullit të Kosovës për mbështetjen e vazhdueshme të Gjermanisë në proceset kyçe të shtetndërtimit, zhvillimit demokratik dhe avancimit të pozitës ndërkombëtare të Kosovës.
Osmani falënderoi ambasadorin Rudolph për kontributin e tij personal në forcimin e marrëdhënieve ndërmjet Kosovës dhe Gjermanisë gjatë mandatit të tij. Ajo rikonfirmoi përkushtimin e palëkundur të Kosovës ndaj aleancës strategjike me Gjermaninë.
Sipas njoftimit të Ambasadës gjermane, takimi ndodhi përpara përfundimit të mandatit të presidentes Osmani. Ambasadori Rudolph i dhuroi asaj një libër mbi historinë e Murit të Berlinit, si kujtesë se vendimet politike mund të ndajnë, por edhe të ribashkojnë njerëzit. Ai shprehu mirënjohjen për bashkëpunimin e shkëlqyer gjatë mandatit të saj dhe i dërgoi urimet më të ngrohta për angazhimet e ardhshme profesionale dhe personale.