Presidentja e Republikës së Kosovës, Vjosa Osmani, priti të martën, më 10 mars 2026, në takim ambasadorin e Mbretërisë së Bashkuar në Kosovë, Jonathan Hargreaves.
Sipas njoftimit të Presidencës, në bisedë u trajtuan zhvillimet e fundit politike në vend. Presidentja shprehu mirënjohjen për mbështetjen e vazhdueshme të Mbretërisë së Bashkuar ndaj Kosovës dhe popullit të saj.
Ajo theksoi përkushtimin e Republikës së Kosovës për të thelluar bashkëpunimin me Mbretërinë e Bashkuar dhe për të hapur kapituj të rinj të partneritetit, që kontribuojnë në arritjen e objektivave të përbashkëta.
Gjatë takimit u nënvizua rëndësia e ruajtjes së një mjedisi demokratik, ku respektohen mendimet e ndryshme dhe debati publik zhvillohet në mënyrë të përgjegjshme. Në këtë kontekst, u theksua se gjuha kërcënuese dhe bullizuese është e papranueshme dhe nuk ka vend në diskursin publik.
Përditësime
Ambasadori britanik Jonathan Hargreaves, në takimin me Presidenten Osmani, theksoi nevojën urgjente për stabilitet politik në Kosovë. Ai deklaroi: «Sot bisedova me Presidenten Osmani për nevojën urgjente që Kosova t’i rikthehet stabilitetit politik për të mundësuar përparim në agjendat e brendshme dhe ndërkombëtare. Në këtë kohë pasigurie politike, diskutimi i respektueshëm dhe konstruktiv është thelbësor për të gjetur rrugën përpara.»