Presidentja e Kosovës Vjosa Osmani priti në takim Ambasadorin e Mbretërisë së Bashkuar në Kosovë, Jonathan Hargreaves, më 9 janar 2026. Gjatë bisedës, ata trajtuan zhvillimet e fundit në vend, duke u përqendruar në procesin e zgjedhjeve të parakohshme të mbajtura më 28 dhjetor 2025.
Sipas njoftimit të Presidencës së Kosovës, zgjedhjet u zhvilluan sipas standardeve më të larta demokratike. Në këtë kontekst, Osmani theksoi rëndësinë e formimit sa më të shpejtë të institucioneve të reja.
Palët diskutuan gjithashtu hapat e ardhshëm për finalizimin e iniciativës së presidentes për lidhjen e marrëveshjeve strategjike me Mbretërinë e Bashkuar. Këto marrëveshje synojnë fushat e interesit të përbashkët, si mbrojtja, siguria, ekonomia dhe tregtia. Dakordësia për këto u arrit gjatë vizitës së Sekretarit të Jashtëm britanik në Kosovë në prill të vitit 2025.
Në përfundim të takimit, Osmani falënderoi dhe shprehu mirënjohje ndaj Britanisë së Madhe për mbështetjen e vazhdueshme ndaj Kosovës.