Organizata e Veteranëve të Luftës së UÇK-së ka publikuar një reagim zyrtar përmes të cilit shpreh mbështetjen për nismën e ish-komandantit Ramush Haradinaj. Propozimi synon që Hashim Thaçi, pas kthimit në Kosovë, të rimarrë mandatin nga Kuvendi i Kosovës dhe të zgjidhet sërish në postin e Presidentit.
Sipas veteranëve, ky propozim mbart peshë kombëtare dhe institucionale, duke kontribuar në krijimin e një fryme unifikuese në vend. Organizata vlerëson se kontributi i Hashim Thaçit gjatë luftës çlirimtare dhe angazhimi i tij në proceset shtetformuese përbëjnë një garanci për përparimin e vendit në raport me aleatët strategjikë.
Në deklaratën e saj, OVL e UÇK-së ka theksuar se kthimi i tij duhet të pritet me dinjitet institucional dhe përmes zgjidhjeve ligjore. Organizata vëren se Kosovës i duhet të shmangë rrethanat që mund të shkaktojnë vakum institucional apo degradim politik, duke kërkuar që interesat shtetërore të vendosen mbi ato partiake. Institucionet dhe subjektet politike janë ftuar ta shqyrtojnë seriozisht këtë propozim si një mundësi për të ruajtur dinjitetin dhe sigurinë e vendit, pa harruar respektin për ata që sakrifikuan për lirinë e vendit.