Organizata e Veteranëve të Luftës së UÇK-së (OVL UÇK) ka reaguar ndaj pjesëmarrjes së disa personave në një protestë të mbajtur në Shqipëri, të cilët kanë përdorur flamurin e kësaj organizate dhe kanë pretenduar se flasin në emër të veteranëve të luftës.
Përmes një njoftimi zyrtar, OVL UÇK ka bërë të ditur se nuk ka asnjë lidhje me këta individë dhe nuk ka pasur asnjë bashkërendim me organizatorët. Sipas organizatës, pretendimet e tyre janë të pavërteta dhe për çdo aktivitet në Tiranë ekziston një përfaqësi zyrtare e miratuar.
Në deklaratë theksohet se stema dhe simbolet e UÇK-së përfaqësojnë sakrificën e luftës çlirimtare dhe nuk mund të shërbejnë si dekor politik për agjenda të përditshme. “Stema e UÇK-së nuk është dekor politik. Është simboli i një lufte të drejtë çlirimtare, i paguar me gjak dhe i mbajtur nga gra e burra që dhanë gjithçka për lirinë e Kosovës”, thuhet në reagim.
Përfaqësuesit e veteranëve kanë kërkuar që emri dhe simbolet e organizatës të trajtohen me integritet dhe kanë bërë thirrje që raste të tilla të mos përsëriten në të ardhmen.
Përditësime
Zëdhënësi i OVL-UÇK, Hysni Gucati, në një intervistë për 'Kosova Live', konfirmoi distancimin e organizatës nga protestat në Tiranë. Ai theksoi se flamujt e shfaqur në shesh nuk përfaqësojnë qëndrimin zyrtar të shoqatës.