Organizata e Veteranëve të Luftës së UÇK-së (OVL UÇK), dega në Has, ka larguar pllakën e vendosur në shtëpinë e Ali dhe Nazife Osmanaj, familje e Heroit të Kombit Mehmet Osmanaj në fshatin Goden.
Sipas njoftimit, pllaka u vendos nga Azem Syla pa konsultim me strukturat lokale të OVL UÇK-së në Has dhe jashtë procedurave institucionale. Këto veprime cenojnë standardet për shënimin e objekteve me rëndësi historike nga periudha e luftës.
OVL UÇK dega në Has thekson se shtëpia e familjes Osmanaj nuk shërbente një individ të vetëm, por funksionoi si bazë e Ushtrisë Çlirimtare të Kosovës gjatë viteve 1997–1999, duke kontribuar në përpjekjet për çlirim dhe sakrificën kolektive.
Organizata kritikoi tendencat për keqpërdorim të emrit të UÇK-së për qëllime politike, sidomos kur individë ose grupe përballen me humbje pushteti. “Kjo dukuri nuk do të tolerohet më në Has”, thuhet në njoftim.
OVL UÇK dega Has po zhvillon proces verifikimi për të gjitha shtëpitë që shërbyen si baza të UÇK-së gjatë luftës, për t’i dokumentuar dhe nderuar sipas ligjit. Ky proces realizohet në bashkëpunim me Qendrën e Memorialeve të Kosovës dhe Qeverinë e Kosovës.
Shtëpia e Heroit Mehmet Osmanaj konsiderohet objekt simbol i rezistencës dhe sakrificës për liri në rajon. Ruajtja e historisë në mënyrë të saktë dhe dinjitoze mbetet obligim moral dhe kombëtar.