Organizata e Veteranëve të Luftës së Ushtrisë Çlirimtare të Kosovës (OVL UÇK) ka shprehur mbështetjen për marshin “Drejtësi, jo politikë!”, të organizuar nga platforma Liria ka Emër. Ngjarja pritet të zhvillohet më 17 shkurt në Prishtinë.
Kryetari i OVL UÇK-së, Hysni Gucati, ka bërë thirrje për pjesëmarrje sa më të madhe të qytetarëve, duke theksuar rëndësinë e unitetit në mbrojtje të vlerave të luftës çlirimtare. Ai deklaroi: “Ne e mbështesim marshin ‘Drejtësi, jo politikë!’, të organizuar nga Liria ka Emër. Ky marsh duhet të jetë madhështor. Ftojmë të gjithë qytetarët e Kosovës që më 17 shkurt të dalin dhe të bashkohen në mbrojtje të atyre që na sollën lirinë dhe ndërtuan shtetin tonë.”
Marshi synon të përcjellë mesazhin se drejtësia duhet të jetë e paanshme dhe larg ndikimeve politike, duke respektuar sakrificën e atyre që kontribuuan për lirinë dhe pavarësinë e Kosovës.
Platforma Liria ka Emër ka falënderuar OVL UÇK-në për mbështetjen, duke vlerësuar rolin e veteranëve në ruajtjen e vlerave të luftës çlirimtare dhe të drejtësisë.