OVL UÇK-së ka reaguar ndaj deklaratave të ambasadorit gjerman Rainer Rudolph, të bëra në një intervistë për RTK-në, lidhur me procesin gjyqësor në Dhomat e Specializuara në Hagë.
Kryetari i OVL UÇK-së, Hysni Gucati, shprehu dyshime serioze për integritetin e procesit gjyqësor. Ai vlerësoi se diskutimi i temës së "dënimeve apo lirimeve" nga ambasadorë ndërkombëtarë pikërisht në prag të vendimit të Gjykatës Speciale nuk është rastësi.
Sipas Gucatit, kjo përbën përpjekje për të parapërgatitur opinionin publik për një vendim që "duket se tashmë është i shkruar diku tjetër". Ai e cilësoi si paragjykim të hapur dhe sinjal të ndikimit të jashtëm, duke theksuar se drejtësia nuk duhet të diktohet apo të ndërtohet me mesazhe diplomatike.
Gucati deklaroi se asnjë vendim që cenon luftën e UÇK-së nuk do të pranohet dhe se nuk lejohet luajtja me sakrificën e veteranëve.
Deklarata e ambasadorit gjerman
Në intervistë, Rainer Rudolph theksoi se Dhomat e Specializuara veprojnë në përputhje me ligjet e Kosovës. Ambasada gjermane ndjek me vëmendje procedurat gjyqësore. Ai kërkoi pranimin e vendimit të gjykatës së pavarur, qoftë për dënime apo lirime nga akuzat.