Rainer Rudolph, ambasadori i Gjermanisë në Kosovë, në një intervistë për RTK, ka komentuar gjyqin në Hagë ndaj ish-krerëve të Ushtrisë Çlirimtare të Kosovës (UÇK).
Diplomati gjerman deklaroi se Dhomat Speciale janë institucione të posaçme që funksionojnë sipas ligjit të Kosovës. Ai shtoi se i përcjellin këto procedura gjyqësore.
Rudolph bëri thirrje që të gjithë të pranojnë vendimin e gjykatës së pavarur, pavarësisht rezultati. "Siç ju e thatë, Dhomat Speciale janë institucione të posaçme që funksionojnë me Ligjin e Kosovës. Normalisht që i përcjellim këto procedura, cilido të jetë rezultati, qoftë nëse ka dënime apo lirime nga akuza, do të ju kërkoja të gjithëve që ta pranojnë vendimin e një gjykate të pavarur", u shpreh ai.
Deklarata e ambasadorit vjen në një moment kur gjyqi në Hagë është drejt përfundimit.