Sipas të dhënave të Agjencisë së Sigurimit të Depozitave (ASD), në fund të vitit 2025 individët në Shqipëri kishin të hapura 2.93 milionë llogari bankare të sigurueshme në bankat e nivelit të dytë, me një rritje prej 5% krahasuar me vitin paraardhës. Në këto llogari kishte gjithsej 1.39 trilionë lekë depozita, me një rritje vjetore prej 8.8%.
34.5% e llogarive, ose mbi 1 milionë depozitues, kishin balancë nga zero deri në 100 lekë. Numri i tyre u rrit me 6.5% krahasuar me 2024-ën.
Rreth 1.78 milionë depozitues, ose 60.8% e totalit, kishin kursime nga 100 lekë deri në 2.5 milionë lekë, kufiri i mbulimit të sigurimit të depozitave. Numri i këtyre depozituesve të vegjël u rrit me 3.9%, por shuma e depozitave të tyre arriti 568 miliardë lekë, ose 40.9% e totalit, në rënie nga 42% një vit më parë.
Në kontrast, 4.7% e depozituesve zotërojnë 59% të kursimeve totale. Kjo tendencë tregon rritje të numrit të depozituesve të mëdhenj dhe atyre me llogari bosh, sipas të dhënave të ASD-së. Sipas ligjit, depozituesi sigurohet 100% në çdo bankë, por jo më shumë se 2.5 milionë lekë.