Sipas Raportit të Mbikëqyrjes Vjetore të Sistemit Bankar për vitin 2025, stoku i kredive të lidhura me pasuritë e paluajtshme në Shqipëri ka arritur në rreth 470 miliardë lekë, ekuivalente me afërsisht 4.7 miliardë euro. Ky portofol përbëhet nga 243.6 miliardë lekë kredi për individët dhe 216 miliardë lekë kredi për bizneset.
Në raport thuhet se huatë për blerje banesash nga individët zënë 26.8% të totalit të kredisë, ndërsa kreditë për pasuri të paluajtshme të marra nga bizneset përbëjnë 24.3%. Kjo rritje e huadhënies është shoqëruar me interes të shtuar, ku vetëm në muajin maj të vitit 2025, bankat dhanë 6.6 miliardë lekë kredi të reja për banesa, shifër kjo që shënoi një rritje prej 54% krahasuar me të njëjtën periudhë të një viti më parë.
Guvernatori i Bankës së Shqipërisë, Gent Sejko, deklaroi gjatë paraqitjes së raportit në komisionet parlamentare se ky nivel i lartë ekspozimi përbën një burim potencial rreziku. Ai theksoi se rritja e shpejtë e çmimeve të pronave dhe kërkesa e lartë mund të ndikojnë stabilitetin financiar në rast të një kthese të ciklit të tregut ose rënies së fuqisë paguese të qytetarëve.
Për të zbutur këto risqe, Banka e Shqipërisë ka miratuar masa shtrënguese për huadhënien:
- Për banesën e parë, raporti i kredisë ndaj vlerës së pronës është kufizuar në 85%, me këst mujor që nuk duhet të kalojë 40% të të ardhurave të huamarrësit.
- Për blerjen e banesës së dytë, tavanet e financimit janë ulur në 80%.
- Kufizime më të rrepta janë aplikuar për kreditë në valutë, përkatësisht në nivelin 75% dhe 70%.
Monitorimi i sektorit mbetet në qendër të vëmendjes së institucioneve financiare, ndërsa tregu imobiliar po ndiqet edhe në kuadër të zhvillimeve të hetimeve nga SPAK në sektorin e ndërtimit.