Ish-presidenti i Kosovës, Behgjet Pacolli, ka shprehur zhgënjim të thellë për zhvillimet e fundit politike në vend. Ai deklaroi se po e vëzhgon situatën "nga periferia" dhe në mënyrë neutrale, duke u fokusuar vetëm në interesin e qytetarëve dhe të shtetit.
Pacolli, i cili në të kaluarën ka shërbyer si ish-shef i diplomacisë dhe ish-zëvendëskryeministër i Kosovës, tha se zhvillimet politike kryhen kryesisht për interesa partiake, klanore, familjare dhe personale. Këto, sipas tij, dëmtojnë qytetarët, Kosovën, imazhin e saj dhe zhvillimin ekonomik të vendit.
"Unë, nga periferia, po e vëzhgoj situatën në mënyrë neutrale dhe vetëm nga aspekti i interesit të qytetarëve dhe të vendit. Dua të them se jam tepër i zhgënjyer, sepse e kam kuptuar dhe e shoh qartë se zhvillimet politike po bëhen kryesisht për interesa partiake, klanore, familjare dhe personale, fatkeqësisht shpesh vetëm në dëm të qytetarëve, të Kosovës, imazhit të saj dhe zhvillimit ekonomik të vendit", u shpreh ai.
Pacolli shtoi se qytetarët tani mund ta kuptojnë pse nuk arriti të realizojë synimet e tij politike. "Shpresoj shumë që qytetarët tani po e kuptojnë pse unë nuk arrita t’i realizoj synimet e mia, të cilat ishin vetëm në interes të qytetarëve, mirëqenies së tyre dhe të shtetit. Nuk arrita në këtë mision sepse isha i vetmuar dhe vota e qytetarit nuk ma mundësoi që në Kosovë të instalohej filozofia e ndershmërisë, respektit ndërnjerëzor, meritokracisë, tolerancës, imazhit pozitiv dhe zhvillimit ekonomik të vendit", deklaroi ish-presidenti.