Afati kushtetues për zgjedhjen e presidentit të Kosovës përfundon sot, 5 mars 2026, ndërsa partitë parlamentare mbeten të ndara rreth kandidaturës që do të marrë mbështetjen e nevojshme në Kuvend.
Lëvizja Vetëvendosje propozoi të mërkurën zyrtarisht Glauk Konjufca si kandidat për president, duke e çuar procesin në fazë vendimtare. Partia thekson gatishmërinë për garë demokratike dhe kërkon nga Lidhja Demokratike e Kosovës dhe Partia Demokratike e Kosovës të propozojnë një emër për të mundësuar thirrjen e seancës dhe votimin.
Nga ana tjetër, LDK dhe PDK kanë deklaruar se nuk do ta mbështesin asnjë kandidat pa një marrëveshje të gjerë politike mes partive parlamentare.
Në këtë kontekst, ish-presidenti Behgjet Pacolli foli për portalin Front Online, duke u bërë thirrje deputetëve të tregohen të përgjegjshëm. Ai shprehu shpresën që përfaqësuesit e popullit të jenë të vetëdijshëm për rëndësinë e momentit dhe të mos lejojnë që vendi të shkojë në zgjedhje të reja.
"Shpresoj që deputetët e Kuvendit të Kosovës të jenë të vetëdijshëm dhe të mos lejojnë që vendi të shkojë përsëri në zgjedhje. Do të ishte e udhës që ata të bisedojnë dhe të zgjedhin kandidatin të cilin do ta votojnë", deklaroi Pacolli.
I pyetur nëse dëshiron të jetë kandidat, Pacolli sqaroi se nuk është më pjesë aktive e politikës. "Jo, unë jam ndarë nga politika dhe kështu është më mirë. Sigurisht, kontributin tim do t’ia jap Kosovës edhe në këtë mënyrë", shtoi ai.