"Paketa e Maleve", nisëm e qeverisë e prezantuar në fillim të vitit të kaluar për të tërhequr investime të shqiptarëve të diasporës në pronat e tyre, ka regjistruar 200 aplikime në disa bashki të vendit.
Ministri i Pushtetit Lokal, Ervin Demo, në një intervistë për gazetaren Rajmonda Lajthia në emisionin "E-ZONE", deklaroi se me ritmet aktuale presin të arrijnë 1000 aplikime deri në fund të vitit. Ai theksoi se kjo shifër tejkalon kufirin prej 500 aplikimesh që përfitojnë përjashtime nga katër taksa.
Aktualisht ekzistojnë 100 zona me përparësi zhvillimi të shtrira në 20 bashki, ndërsa puna vazhdon për të përcaktuar zona të tjera. Bashkitë me interes më të lartë janë Shkodra, Vau i Dejës dhe Kukësi, me interes që shtrihet nga veriu në jug.
Aplikantët kryesisht kanë lidhje me territorin ku duan të investojnë. Janë shqiptarë të diasporës me prona në zonat përkatëse, por edhe individë që jetojnë në vend. Fokusi kryesor është në sektorin e turizmit, veçanërisht në agroturizëm, njësi shërbimi dhe akomodim.
Nisma parashikon për 500 aplikantët e parë që do të përzgjidhen përjashtim nga taksa e ndikimit në infrastrukturë, tatimi mbi të ardhurat, taksa e pasurive të patundshme dhe TVSH-ja për transaksionet e lidhura me projektin. Për më tepër, prona i jepet investitorit me vlerë simbolike 1 euro, edhe në mungesë të titullit të pronësisë, me kusht që ta marrë pas kryerjes së investimit.