Papa Leone XIV ka kërkuar armëpushim të menjëhershëm dhe forcim të dialogut në konfliktin Rusi-Ukrainë, që ka hyrë në vitin e katërt. Apeli u bë gjatë fjalimit të përjavshëm para besimtarëve në Sheshin e Shën Pjetrit në Vatikan, më 22 shkurt 2026.
Gjatë lutjes së Angelusit, Ati i Shenjtë u shpreh se "zemra ime shkon sërish tek kjo situatë. Ka kaq shumë viktima, jetë dhe familje të thyera, kaq shumë shkatërrim dhe vuajtje të pashprehshme".
Papa Leone XIV përsëriti me forcë: "Paqja nuk mund të shtyhet, është një nevojë urgjente që duhet të gjejë vend në zemra dhe të kthehet në vendime të përgjegjshme. Për këtë arsye, e përsëris me forcë apelin tim: armët të heshtin, bombardimet të ndalen, të arrihet pa vonesë një armëpushim dhe dialogu të forcohet për t’i hapur rrugë paqes."
Ai e cilësoi luftën si "një plagë për të gjithë familjen njerëzore", që lë pas vdekje, shkatërrim dhe dhimbje që prekin breza të tërë. Thirrja vjen në një kohë kur konflikti vazhdon të shkaktojë viktima dhe shkatërrime të mëdha, ndërsa përpjekjet ndërkombëtare për ndërmjetësim mbeten të brishta.
Ati i Shenjtë ka theksuar vazhdimisht nevojën për negociata dhe zgjidhje paqësore, duke ftuar komunitetin ndërkombëtar të veprojë me përgjegjësi dhe urgjencë.