Paralajmërimet për një rritje të mundshme të çmimit të energjisë elektrike në Kosovë kanë nxitur shqetësimet e qytetarëve dhe bizneseve, në një kohë kur kostoja e jetesës vazhdon të rritet. Ky zhvillim vjen ndërsa familjet përballen me shtrenjtim të produkteve bazë dhe shërbimeve, çka mund të rëndojë më tej buxhetet familjare.
Ekspertët paralajmërojnë se çdo rritje e tarifave të energjisë mund të shkaktojë efekt zinxhir në çmimet e tjera, duke ndikuar drejtpërdrejt në standardin e jetesës. Në këtë kontekst, Zyra e Rregullatorit për Energji (ZRRE) ka dhënë sqarime në lidhje me procesin e shqyrtimit të tarifave. Sipas saj, ky proces zhvillohet në disa faza rregullative, në përputhje me kornizën ligjore në fuqi, dhe nuk mund të paragjykohet rezultati në këtë fazë.
Aplikimet për të hyrat e lejuara nga operatorët dhe furnizuesit e licencuar pritet të dorëzohen gjatë javës së tretë të muajit janar 2026. Pas kësaj, ZRRE do të nisë shqyrtimin dhe vlerësimin rregullativ të këtyre aplikimeve. Vendimi përfundimtar për tarifat pritet të merret gjatë muajit mars 2026, ndërsa zbatimi i tyre, nëse aprovohen, do të fillojë nga muaji prill 2026.
Nga ZRRE theksohet se nuk mund të përcaktohet ende nëse tarifat do të rriten, ulen apo mbeten të pandryshuara, pasi kjo varet nga rezultatet e shqyrtimit dhe kostot e justifikuara të paraqitura nga operatorët.
Deputeti i zgjedhur i Partisë Demokratike të Kosovës, Ferat Shala, ka paralajmëruar se rritja e çmimit të energjisë elektrike është e paraparë nga institucionet përgjegjëse dhe pritet të ndodhë në pranverën e ardhshme. Sipas tij, të dhënat zyrtare të publikuara nga ZRRE dhe instanca të tjera relevante tregojnë se kjo rritje duket e pashmangshme.