Për ditën e shtunë, 30 maj 2026, Shqipëria do të ndikohet nga kushte atmosferike të qëndrueshme, duke sjellë mot kryesisht të kthjellët në pjesën më të madhe të territorit. Gjatë orëve të mesditës dhe pasdites, parashikohet shtim i vranësirave të pakta deri mesatare, të cilat do të përqendrohen kryesisht në zonat malore të lindjes dhe në malësitë e zonës së jugut.
Në zonën e jugut, vranësirat do të shoqërohen me reshje shiu me intensitet të ulët nga orët e mesditës deri në ato të pasdites. Këto reshje do të jenë lokale dhe të përkohshme.
Era do të fryjë nga kuadrati i veriut me shpejtësi mesatare prej 7 m/s. Përgjatë vijës bregdetare dhe në zonat luginore, era do të fitojë shpejtësi duke arritur deri në 14 m/s. Sa i përket situatës detare, valëzimi në detin Adriatik dhe Jon do të jetë i forcës 2 deri në 4 ballë.