Ditën e sotme, 15 gusht 2026, Shqipëria do të ndikohet nga masa ajrore relativisht të lagështa dhe më të freskëta me origjinë veriperëndimore. Moti do të nisë me kthjellime, ndërsa gjatë orëve të mesditës dhe pasdites pritet shtim i vranësirave mesatare dhe të dendura, kryesisht në zonën e qendrës dhe të jugut.
Vranësirat e dendura do të shoqërohen me reshje shiu të herëpashershme me intensitet të ulët në këto zona. Ndërkohë, në zonën e juglindjes, reshjet do të shfaqen në formën e shtrëngatave, të shoqëruara me shkarkesa elektrike dhe breshër. Temperaturat maksimale për këtë ditë parashikohet të arrijnë vlerën 35 gradë Celsius, ndërsa vlerat minimale pritet të zbresin deri në 14 gradë Celsius.
Era do të fryjë me drejtim nga veriperëndimi dhe verilindja, me një shpejtësi mesatare prej 7 m/s. Përgjatë vijës bregdetare dhe në zonat luginore, era do të arrijë shpejtësi deri në 14 m/s. Valëzimi në det do të jetë i forcës 1-3 ballë.